Quanno na squatra cagna juoco, uso
e allenatore…è pe’ ffà ‘o risurtato
ma ‘a chesta Roma c’’o mutore fuso
pròpëto chesto nun è capitato…!
Pallotta nce capisce poco o niente
doppo a Ranieri a Sarri ‘a vò affidà
pure si chisto fà l’indifferente
s’è ccapito c’’a Roma ‘a vò allenà!…
Pe’ lloro è stato nu bruttu mumento
hanno acchiappato ‘o Napule cchiù forte
ch’è bbenuto c’’a forza e ‘o sentimento
e ha miso sti tre punte in casciaforte!
Milik è addeventato n’ira ‘e Ddio
e Manolas è gghiuto ô manicomio
all’urdemo è stat’Isso isso a pavà ‘o fio
senza fermà chesta specie ‘e demmonio!…
Ancelotti stu derby l’ha sturiato
a tavulino primma ‘e accummincià
e ‘a vittoria cchiù bella nce ha rialato
pecchè sti ccose ‘e ssape overo fà!
Quatte purpette,na brutta mazziata
na Roma ca nun accucchiava niente
e nnuje l’avimmo spisso perdunata
pe’ nn’’a rompere pure mole e diente…
Sta squatra vence pecchè sape jucà
facenno ô tifo azzurro cunzulà!…
Vincenzo Falsetti
IL POETA DEL NAPOLI
Giornalista